Psalms 25

Pangamuyo para sa Proteksyon kag Pagtuytoy sang Dios

Ang kanta nga ginsulat ni David.

1– 2Ginoo nga akon Dios,
sa imo ako nagapangamuyo kag nagasalig.
Indi pagtuguti nga mahuy-an ako
ukon magkalipay ang akon mga kaaway sa akon pagkapierdi.
3Ang nagasalig sa imo indi mahuy-an,
pero ang nagaluib sa imo nga wala man lang sing kabangdanan mahuy-an.

4 Ginoo, tudlui ako sang imo mga pamaagi.
5Tudlui ako sa pagkabuhi nga suno sa imo kamatuoran,
kay ikaw ang Dios nga akon manluluwas.
Ikaw ang akon ginasaligan permi.
6Dumduma, Ginoo, ang imo kaluoy kag gugma
nga imo ginpakita halin pa gid sang una.
7Indi na pagdumduma ang mga sala nga nahimo ko sang pamatan-on pa ako.
Suno sa imo gugma dumduma ako, Ginoo,
para mapakita mo ang imo kaayo.

8Maayo kag matarong ka, Ginoo,
gani ginatudluan mo ang mga makasasala sang imo pamaagi.
9Ginatuytuyan mo ang mga mapainubuson sa paghimo sang husto.
Ginatudluan mo sila sang imo pamaagi.
10Sa tanan mo nga ginahimo, ginapakita mo ang imo gugma kag katutom
sa mga nagasunod sa ginapatuman sang imo kasugtanan.
11Bisan madamo ang akon mga sala, Ginoo, patawara ako,
para mapadunggan ka.
12Ang mga nagatahod sa imo, Ginoo,
tudluan mo sang dalan nga dapat nila agyan.
13Magakabuhi sila nga mainuswagon
kag ang ila mga kaliwat padayon nga magaestar sa duta ▼

▼padayon…sa duta: sa literal, magapanubli sang duta

sang Israel.
14Malapit ka, Ginoo, sa mga nagatahod sa imo
kag ginapadumdom mo sila sang imo kasugtanan.
15Sa imo ako permi nagadangop,
kay ikaw ang nagaluwas sa akon sa katalagman.
16Talupangda ako kag kaluoyi,
kay nagaisahanon ako kag ginadaogdaog.
17Nagdamo na gid ang akon mga kalisod;
hilwaya ako sa akon mga pagpalibog.
18Talupangda ang akon mga pag-antos,
kag patawara ang tanan ko nga sala.
19Tan-awa kon daw ano kadamo ang akon mga kaaway
kag kon daw ano ang ila pagdumot sa akon.
20Tipigi ang akon kabuhi kag luwasa ako!
Indi ako pagpakahuy-i, kay sa imo ako nagapangayo sang proteksyon.
21Matarong ang akon kabuhi ▼

▼ang akon kabuhi: ukon, ikaw

kag wala sing kasawayan,
gani protektari ako.
Kay nagasalig ako sa imo.
22Luwasa, O Dios, ang mga Israelinhon sa tanan nila nga kalisod.